မျှော်လင့်ခြင်းမဲ့မျက်ဝန်းတွေရယ်နဲ့
ကိုယ့်စိတ်နဲ့ကိုယ့်ကိုယ်ဟာ
ဘယ်လောက်များ
သဟဇာတဖြစ်လိုက်ကြသလဲကွယ်။
ဒီဇင်ဘာတွေကို
ပြက္ခဒိန်ပေါ်မှာအပြည့်ဖြည့်လိုက်တယ်
လောကထဲနင့်နင့်နဲနဲယုံကြည်ဖို့လိုအပ်လာတဲ့အခါ
ဓာတ်ပုံပေါင်းများစွာထဲက
မင်းမျက်ဝန်းတွေကို ငေးကြည့်ရတယ်။
သိပ်ပြီးခြောက်ခြားလာတဲ့အခါ
မင်းရင်ငွေ့နဲ့ ကိုယ့်ကိုယ်ကိုယ် ပြန်နွေးရတယ်။
စိတ်ရောကိုယ်ပါဖျားနာနေတဲ့ဒီဇင်ဘာဟာ
ခြစ်ခြစ်တောက်ပူလို့။
စိတ်အသေတွေဟာ
နေဝင်တာရယ်နေထွက်တာရယ်
ပြက္ခဒိန်စာရွက်တွေတစ်ရွက်ပြီးတစ်ရွက်ရယ်။
ဘဝထဲ
မင်းမရှိရင်ဘာမှမရှိကြတော့ဘူး။
မျက်ရည်စက်တွေကိုကြိုးမျှင်လိုဆက်လိုက်လို့
မင်းဆီရောက်နိုင်မယ်ဆို
ဘာကိုမှ ကိုယ်မကြောက်ပါဘူး။
ပင်လယ်ကအကျယ်ကြီးဆိုလည်း
မင်းလက်ကလေးကိုင်ထားရမယ်ဆို
လွင့်နေအောင်ပျော်နေဦးမှာ။
လျှောက်ခဲ့ရတဲ့လမ်းတွေဟာမဖြောင့်ဘူး
အမှောင်ကြိုက်တဲ့သူမှာ
အမှားအယွင်းတွေ
အကျအပေါက်တွေလည်းစေးစေးပိုင်ပိုင်။
မေတ္တာကလွဲလို့ ဘာမှသယ်မလာနိုင်ခဲ့တာ
အားနာတယ်
စိုစွတ်ခဲ့တဲ့လေပြေတွေကိုလည်းအားနာတယ်။
အိမ်ပြန်ချိန်တွေ မှုန်မှိုင်းလာတဲ့အခါ
မင်းလက်ကလေးတွဲထားချင်ခဲ့တာကလွဲလို့
ဘာကိုမှ ကိုယ်မလိုချင်ခဲ့ပါဘူး။
ဒီဇင်ဘာမှာ
သေပန်းကလွဲလို့ဘာပန်းမှထပ်မပွင့်ကြတော့ဘူး
ဘယ်တော့မှမခွဲဘူးနော်
ဆိုတဲ့အသံလေးက အကျယ်ကြီးငိုတယ်။ ။
မေဇော်
21.12.2016
21.12.2016
♥ M ♥
© hsudiary.blogspot.com. All Rights Reserved.
No comments:
Post a Comment